طیارے گرنے کا اعتراف، بھارتی فوج کے چیف آف ڈیفنس سے مستعفی ہونے کا مطالبہ

بھارتی فوج کے سابق افسر اور دفاعی تجزیہ کار پراوین سواہنی نے بھارتی چیف آف ڈیفنس اسٹاف انیل چوہان سے مستعفی ہونے کا مطالبہ کردیا۔

پراوین سواہنی نے کہا ہے کہ جب سے مودی اقتدار میں آئے ہیں بھارتی فضائیہ تنزلی کا شکار ہے، بھارت کو ایسی سرکار کی ضرورت ہے جو جدید جنگوں کو سمجھتی ہو، ایسے اعترافات کے بعد بھی آپریشن سندور کی کامیابی کا دعویٰ کرنا عجیب ہے۔

خیال رہے کہ بھارتی فوج کے چیف آف ڈیفنس اسٹاف انیل چوہان نے پاک فضائیہ کے ہاتھوں بھارتی طیارے گرنے کا اعتراف کیا تھا، جس کے بعد بھارت میں ہنگامہ برپا ہو گیا۔

عسکری تجزیہ کار پراوین ساہنی نے کہا کہ اب جبکہ انیل چوہان نے 6 اور 7  مئی کی رات کو ہونے والے لڑاکا طیاروں کے نقصانات کا اعتراف کر لیا ہے، تو اُنہیں مستعفی ہو جانا چاہیے اور مودی حکومت کو چاہیے کہ کسی ایئر فورس کے افسر کو سی ڈی ایس مقرر کرے، یا پھر بہتر یہی ہو گا کہ اس نظریاتی عہدے کو ہی ختم کر دیا جائے۔

پراوین ساہنی نے کہا کہ انیل چوہان بظاہر جنگی حکمتِ عملی کو سمجھنے سے قاصر ہیں، بھارت اور پاکستان کے درمیان کسی بھی ممکنہ جنگ میں فضائی برتری جلد از جلد حاصل کرنا ہی جنگ کے نتیجے کا فیصلہ کرے گا، بدقسمتی سے، ایئر فورس بھی راہ سے بھٹک چکی ہے۔

انہوں نے کہا کہ  مئی 2014ء میں مودی حکومت کے اقتدار میں آنے کے بعد، اُس وقت کے بھارتی ایئر چیف مارشل اروپ راہا وہ پہلے شخص تھے جنہوں نے ایئر فورس کو کمزور بنایا، اُن کے جانشین بھی ویسے ہی نکلے۔

پراوین ساہنی کے مطابق بھارت کو ایسی حکومت کی ضرورت ہے جو بدلتی ہوئی عالمی جغرافیائی سیاست میں فوجی طاقت کی اہمیت کو سمجھے اور اسے آپریشن سندور جیسے ڈرامے میں استعمال نہ کرے۔

بھارتی چیف آف ڈیفنس اسٹاف انیل چوہان کے اعتراف پر اس سے قبل اپوزیشن کانگریس پارٹی نے مودی حکومت پر کڑی تنقید کرتے ہوئے کہا تھا کہ مودی حکومت قوم کو گمراہ کر رہی ہے، امریکی صدر ٹرمپ بار بار جنگ بندی معاہدہ کروانے کا دعویٰ کر رہے ہیں، اس پر وضاحت کے بجائے مودی انتخابی مہم میں مصروف ہیں۔

 کانگریس کا کہنا تھا کہ مودی بہادر افواج کی کارکردگی کا کریڈٹ لے کر جنگ بندی کی تفصیلات سے بچ رہے ہیں، اس جنگ بندی معاہدے کی شرائط کیا ہیں؟ بھارتی شہریوں کو یہ جاننے کا حق ہے۔

اپوزیشن جماعت  کانگریس نے پارلیمنٹ کا خصوصی اجلاس فوری بلانے اور دفاعی تیاریوں کے جامع جائزہ کے لیے آزاد ماہرین کی کمیٹی بنانے کا مطالبہ بھی کیا ہے۔

اسی معاملے پر بھارتی صحافیوں نے بھی مودی سرکار اوربھارتی فوج کو آڑے ہاتھوں لے رکھا ہے۔ 

معروف صحافی پنکج پچوری نے طنزیہ کہا کہ سنگاپوری بزنس نیوز چینل نے بھارتی طیارے گرائے جانے کی بڑی بریکنگ دے کر بھارتی میڈیا کی اہلیت پر سوالیہ نشان لگا دیا ہے، ڈھیر سارے نیوز چینلز اور ان پر گھنٹوں چلنے والے نیوز شوز، سب کے سب جنگی طیارے گرنے کی تصدیق کرنے میں ناکام رہے۔

متعدد کتابوں کی مصنفہ اور راجیہ سبھا کی رکن ساگریکا گھوش نے سوال اٹھایا ہے کہ بھارتی چیف آف ڈیفنس اسٹاف نے یہ سچ پہلے بھارتی شہریوں کو کیوں نہیں بتایا؟ پارلیمنٹ اور عوامی نمائندوں سے یہ سب کیوں چھپایا گیا؟