لودھراں: قصور سے پاکستان تحریک انصاف کے سابق ایم این اے سردار طالب نکئی، ایاز نکئی، سابق ایم پی اے پیر مختار، سابق ٹکٹ ہولڈرز رانا اسلم، راو شاہد اور پی ٹی آئی ضلع قصور کے سابق جنرل سیکرٹری علی جاوید ڈوگر نے استحکام پاکستان پارٹی کے چیئرمین جہانگیر ترین اور صدر عبدالعلیم خان سے ملاقات کے بعد استحکام پاکستان پارٹی میں شمولیت کا اعلان کردیا ۔ اس موقع پر میڈیا سے گفتگو کرتے ہوئے۔
استحکام پاکستان پارٹی کے چیئرمین جہانگیر ترین نے کہا کہ اگر الیکشن چند دن تاخیر کا شکار ہوتے ہیں تو اس سے کوئی فرق نہیں پڑتا۔ انہوں نے کہ مجھے آج بہت خوشی ہے کہ ضلع قصور کے مالک آج ہمیں جوائن کر رہے ہیں۔ اجتماعی کوشش کے ساتھ ہم حکومت بنائیں گے اور ملک کی خدمت کریں گے۔انہوں نے کہا کہ دس سال بعد نئی مردم شماری ہوئی ہے جس سے فرق پڑتا ہے، نئی حکومت کو نئی مردم شماری پر منتخب کرنا انصاف ہے۔ اگر الیکشن چند دن تاخیر کا شکار ہوتے ہیں اس سے کوئی فرق نہیں پڑتا۔
جہانگیر ترین نے کہا کہ میں نے اور علیم خان نے ہمیشہ سچ بولا ہے جس فورم پر ہمیں بلایا جائے گا ہم پیش ہونگے اور سچ بتائیں گے۔
استحکام پاکستان پارٹی کے صدر عبد العلیم خان نے پریس کانفرنس سے خطاب میں کہا کہ تمام دوستوں کا شکریہ ادا کرتا ہوں، بہت سارے دوست ہمارے ساتھ رابطے میں ہیں۔ پورے پنجاب سے مختلف گروپ ہمارے ساتھ شامل ہو رہے ہیں۔
عبد العلیم خان نے کہا کہ ہر ہفتے ایک نیا اعلان کریں گے۔ ہم سب دوست اپنے منشور کے مطابق کام کریں گے اور ملک کو آگے لے کر جائیں گے۔انہوں نے کہ ابھی کرپشن سامنے نہیں آئی، چیئرمین پی ٹی آئی دوسروں کو چور کہتے تھے، انہوں نے اپنے پاس کوئی ہار، ہیرا اور گھڑی نہیں چھوڑی، ابھی پہلا قطرہ نظر آیا ہے آگے چل کر اور چیزیں نظر آئیں گی۔
صدر عبد العلیم خان نے کہا کہ عثمان بزدار اور فرح گوگی کے پکڑے جانے تک سچائی سامنے نہیں آئے گی۔
